Veshkat janë ndër organet më të rëndësishme në trupin e njeriut. Ato janë themeli i shëndetit metabolik, pasi rregullojnë tensionin e gjakut, forcojnë kockat, rregullojnë elektrolitet në trup dhe filtrojnë toksinat dhe lëngjet e panevojshme.

Funksioni kryesor i veshkave është të filtrojnë mbetjet nga gjaku dhe t’i nxjerrin ato nëpërmjet urinimit. Veshkat ndihmojnë gjithashtu në kontrollin e tensionit të gjakut dhe sigurohen nëse keni mjaftueshëm qeliza të kuqe të gjakut. Kanceri i veshkës, quajtur ndryshe karcinoma renale, shfaqet kur qelizat tek njëra apo të dyja veshkat fillojnë të rriten në mënyrë jonormale dhe formojnë një masë tumorale që vendoset sipër qelizave të shëndetshme. Ky lloj kanceri është 1 nga 10 më të përhapurit si tek burrat ashtu edhe gratë.

Karcinoma renale

Ka disa lloje të kancerit të veshkës, megjithatë 9 në 10 njerëz vuajnë nga karcinoma renale. Zakonisht është një tumor brenda veshkës, megjithatë mund të shfaqen edhe më shumë, si edhe tek të dyja veshkat.

Cilët persona janë më të rrezikuar?

Shumica e njerëzve të diagnostikuar me kancer të veshkës janë rreth moshës 50-70 vjeç. Burrat janë 2-3 herë më të rrezikuar se gratë, dhe afrikano-amerikanët janë ndër popujt më të rrezikuar. Tensioni i lartë i gjakut, sëmundja e veshkave dhe probleme të caktuara me gjenet, si sëmundja Hippel-Lindau, gjithashtu mund të rrisin rrezikun. Mund të trashëgohet edhe në familje.

Faktorë të tjerë që rrisin rrezikun

Jeni më të rrezikuar që të zhvilloni kancer të veshkave nëse:

Pini duhan: Duhanpirja dyfishon rrezikun. Mendohet se duhani është shkaktari i 30% të rasteve me kancer tek meshkujt dhe 25% tek femrat.

Jeni mbipeshë: Njerëzit mbipeshë ose obezë janë gati dyfish më të rrezikuar që të zhvillojnë kancer të veshkës.

Merrni shumë ilaçe për lehtësimin e dhimbjeve: Përdorimi për një periudhë shumë të gjatë të aspirinës, acetaminofenin ose ibuprofenit mund të rrisë rrezikun.

 Simptomat

Nëse masa tumorale është shumë e vogël, mund të mos vëreni asnjë simptomë. Ndërsa masat e mëdha tumorale mund të shkaktojnë këto probleme:

• Gjak në urinë
• Shfaqet një gjëndër anash ose në shpinë
• Keni dhimbje në pjesën e poshtme të shpinës
• Ndiheni të lodhur
• Keni humbur shumë peshë pa asnjë arsye
• Keni temperaturë të lartë të trupit